यशवंत विचारांच्या स्वाभिमानी सभासदांचा हा विजय – बाळासाहेब पाटील

कराड/प्रतिनिधी : –

स्व. यशवंतराव चव्हाण साहेबांच्या पुतळ्यासमोर शड्डू ठोकून त्यांचा अपमान करणाऱ्या प्रवृत्तीला सभासदांनी निकालाच्या माध्यमातून कारखान्यात येण्यापासून रोखले आहे. त्यामुळे हा विजय आपण यशवंत विचारांच्या सभासदांसाठी समर्पित करत असल्याचे प्रतिपादन माजी सहकार व पणन मंत्री बाळासाहेब पाटील यांनी केले.

सह्याद्रि कारखान्याच्या निवडणुकीत विजयश्री मिळवून निर्विवाद सत्ता मिळवल्यानंतर आयोजित विजयी आभार सभेत उपस्थितांना मतग्दर्शन करताना ते बोलत होते. यावेळी पी. डी. पाटील पॅनेलच्या विजयी उमेदवारांसह माजी सभापती देवराज पाटील, अजितराव पाटील-चिखलीकर, माजी नगराध्यक्ष जयवंत पाटील यांची प्रमुखा उपस्थिती होती.

यावेळी बोलताना बाळासाहेब पाटील म्हणाले, सह्याद्रि कारखान्यावर कोणतेही कर्ज नसताना दिशाभूल करून सभासदांमध्ये संभ्रमावस्था पसरवण्याचे काम विरोधकांनी केले. मात्र, त्या प्रवृत्तीळाही या निमित्ताने सभासदांनी कारखान्याबाहेर ठेवली आहे. आता यापुढच्या काळात जिल्हा परिषद, पंचायत समिती, नगरपालिकांच्या निवडणुकांनामध्येही याच जोमाने लढून त्या जिंकायच्या आहेत, त्यासाठी सर्वांनी सज्ज राहावे, असे आवाहनही त्यांनी यावेळी केले.

यावेळी जशराज पाटील, देवराज पाटील, श्री. चिखलीकर, माजी नगराध्यक्ष पाटील यांनी मनोगत व्यक्त केले. प्रास्ताविक प्रशांत यादव, सूत्रसंचालन जयंत बेडेकर यांनी केले.