कृष्णा कारखान्याचा वजनकाटा ‘धर्मकाटा’

कराड/प्रतिनिधी : –

य. मो. कृष्णा सहकारी साखर कारखान्याचा वजनकाटा आपल्या अचूकतेमुळे नेहमीच ‘धर्मकाटा’ म्हणून ओळखला जातो. जिल्हाधिकार्‍यांच्या आदेशानुसार शासकीय भरारी पथकाने कारखान्याच्या वजनकाट्याची अचानक भेट देऊन तपासणी केली. त्यावेळी भरारी पथकाच्या सदस्यांनी विविध निकषांच्या आधारे वारंवार केलेल्या वजनावेळी, प्रत्येकवेळी कृष्णा कारखान्याचा वजनकाटा अचूक असल्याचे सिद्ध झाले. त्यामुळे नेहमीप्रमाणे कृष्णाच्या वजनकाट्याने ‘धर्मकाटा’ ही ओळख अबाधित ठेवली आहे.

सातारा जिल्ह्यातील विविध साखर कारखान्यांच्या वजनकाट्यांची तपासणी करण्याबाबत जिल्हाधिकारी संतोष पाटील यांनी वजन काटे तपासणीबाबत आदेश काढले. यानुसार वजनमापे निरीक्षक योगेश अग्रवाल, पोलीस उपनिरीक्षक साक्षात्कार पाटील, रयत क्रांती शेतकरी संघटनेचे अशोक लोहार, बळीराजा शेतकरी संघटनेचे सातारा जिल्हा उपाध्यक्ष सुनिल कोळी, स्वाभिमानी शेतकरी संघटनेचे जिल्हा उपाध्यक्ष उत्तम साळुंखे,आकाश कांबळे, विशेष लेखा परीक्षक एस. आर. सानप, लेखा परीक्षक डी.ए. जाधव, उप लेखापरीक्षक एस.एस.जंगम, विशाल थोरवडे, बळीराजा शेतकरी संघटनेचे दिपक पाटील,शेतकरी संघटनेचे तात्यासो पाटील यांनी संयुक्तपणे कृष्णा कारखान्याला अचानक भेट देऊन कारखान्याच्या ऊस वजन काट्याची तपासणी केली.

ऊसाने भरलेल्या गाड्यांचे प्रत्यक्ष वजन करून, गव्हाणीकडे गेलेल्या गाड्या फेरवजन करण्यासाठी परत इलेक्ट्रॉनिक वे ब्रीजवर बोलवण्यात आल्या. या चाचणीवेळी अचूक वजन नोंदविण्यात येत असल्याचे या समितीला दिसून आले. तसेच वजनकाट्याबाहेर लावलेल्या डिस्प्लेवर भरलेल्या गाड्यांचे व रिकाम्या गाड्यांचे वजन अचूकपणे होत असल्याचे दिसून आल्याने कृष्णा कारखान्याचा वजनकाटा अचूक असल्याचा शेरा पथकाने दिला. यावेळी मॅनेजिंग डायरेक्टर बाजीराव सुतार, जनरल मॅनेजर टेक्निकल बालाजी पबसेटवार, इन्स्ट्रुमेंट इंजिनिअर सत्यजित घाडगे, केनयार्ड सुपरव्हायझर विजय मोहिते आदी उपस्थित होते.