हर्षद कदम यांच्या प्रचारार्थ धडाडणार  उद्धव ठाकरेंची तोफ 

पाटण विधानसभा मतदारसंघात यावेळी राज्याचे राज्य उत्पादन शुल्क मंत्री तथा सातारा व ठाणे जिल्ह्याचे पालकमंत्री, मतदारसंघाचे विद्यमान आमदार शंभूराज देसाई, तसेच माजी मंत्री विक्रमसिंह पाटणकर यांचे सुपुत्र सत्यजितसिंह पाटणकर आणि शिवसेना महाविकास आघाडीचे अधिकृत उमेदवार हर्षद कदम यांच्यात होणारी लढत संपूर्ण राज्यासाठी लक्षवेधी ठरली आहे. सध्या येथे प्रचाराची रणधुमाळी सुरू असून मतदारसंघात मोठी वातावरण निर्मिती झाली आहे.

मल्हारपेठ, ता. पाटण येथे रविवार, दि. 17 रोजी सकाळी 10.30 वाजता हर्षद कदम यांच्या प्रचारार्थ शिवसेना पक्षप्रमुख उद्धव ठाकरे यांची जाहीर प्रचारसभा होणार आहे. यातून शिवसैनिकांना चांगलीच नवसंजीवनी मिळणार असल्याने उद्धव ठाकरे यांच्या सभेची उत्सुकता वाढली आहे.

पाटण विधानसभा मतदारसंघात पिढ्यांपिढ्याची घराणेशाही असून येथील जनता त्याला वैतागली असल्याचे सांगत मतदारसंघातील परिस्थितीबाबत बोलताना हर्षद कदम म्हणाले, येथील लोकप्रतिनिधींनी बंडखोरी, गद्दारी केल्यामुळे मतदारसंघावर मोठा कलंक लागला आहे. तसेच या ठिकाणी झालेल्या अनेक विकासकामांमध्ये मोठा भ्रष्टाचारीही झाला आहे. या सर्व बाबतीत प्रचारसभा व कोपरा सभांच्या  माध्यमातून आपण चांगलेच रान उठवले आहे. तसेच ही निवडणूक आता निर्णय टप्प्यावर आली असून त्याचे नक्कीच गुलालात परिवर्तन होईल, असा विश्वासही श्री. कदम यांनी व्यक्त केला आहे.

या सभेला मतदारसंघातील जास्तीत जास्त युवक, शिवसैनिक, नागरिक, महिला भगिनींनी मोठ्या संख्येने उपस्थित राहावे, असे आवाहनही उमेदवार हर्षद कदम यांनी केले आहे.