उंडाळे प्रादेशिक पाणीपुरवठा योजनेचा उर्वरित २० टक्के निधी तात्काळ मंजूर करा – आमदार डॉ. अतुलबाबा भोसले
विधानसभेत उपस्थित केला औचित्याचा मुद्दा
कराड/प्रतिनिधी : –
उंडाळे प्रादेशिक पाणीपुरवठा योजनेवर आतापर्यंत सुमारे ८० टक्के खर्च झालेला असून, शासनाने उर्वरित २० टक्के निधी तत्काळ उपलब्ध करुन द्यावा, अशी मागणी कराड दक्षिणचे आमदार डॉ. अतुलबाबा भोसले यांनी आज विधानसभेत औचित्याचा मुद्दा मांडताना केली.
विधानसभेच्या अर्थसंकल्पीय अधिवेशनात कराड दक्षिणचे आमदार डॉ. अतुलबाबा भोसले उंडाळे प्रादेशिक पाणीपुरवठा योजनेबाबत औचित्याचा मुद्दा उपस्थित करत, योजनेच्या प्रलंबित निधीबाबत सभागृहाचे लक्ष वेधले.
ते म्हणाले, उंडाळे प्रादेशिक पाणीपुरवठा योजनेचे काम गेल्या काही वर्षांपासून सुरू आहे. दरम्यानच्या काळात या योजनेअंतर्गत समाविष्ट करण्यात आलेल्या १७ गावांपैकी काही गावांनी स्वतःच्या स्वतंत्र पाणीपुरवठा योजना राबवल्यामुळे, त्या गावांना आता या प्रादेशिक योजनेतील पाण्याची गरज उरलेली नाही. त्यामुळे योजनेच्या मूळ आराखड्यात आवश्यक बदल करून प्रत्यक्षात पाणीटंचाईचा सामना करणाऱ्या गावांना प्राधान्य देणे आवश्यक आहे.
उंडाळे योजनेवर आतापर्यंत सुमारे ८० टक्के खर्च झालेला असून, केवळ २० टक्के खर्च शिल्लक आहे. त्यामुळे उर्वरित निधी तात्काळ उपलब्ध करून दिल्यास ही योजना लवकर कार्यान्वित होऊ शकते. तसेच याचा लाभ कराड दक्षिणमधील कोयना वसाहत, नांदलापूर या गावांसह मलकापूर शहराच्या विस्तारित भागाला करुन देता येईल. म्हणूनच शासनाने आतापर्यंत गुंतवलेला मोठा निधी वाया जाऊ नये आणि खऱ्या अर्थाने पाणीटंचाईग्रस्त गावांना दिलासा मिळावा, यासाठी योजनेच्या पूर्णत्वासाठी उर्वरित २० टक्के निधी द्यावा. तसेच योजनेची पुनर्रचना करण्याबाबत तातडीने निर्णय घ्यावा, अशी विनंती आ.डॉ. भोसले यांनी शासनाकडे केली.
