नांदगाव येथे दक्षिण मांड नदीवर नवा पूल उभारणीसाठी ७ कोटींचा निधी मंजूर

कराड/प्रतिनिधी : –

कराड दक्षिण मतदारसंघातील नांदगाव (ता. कराड) येथे दक्षिण मांड नदीवरील सुमारे ५० वर्षे जुन्या पुलाच्या जागी आता आधुनिक व भव्य अशा नवीन पुलाची उभारणी करण्यात येणार आहे. आमदार डॉ. अतुल भोसले यांच्या सातत्यपूर्ण पाठपुराव्यामुळे सार्वजनिक बांधकाम विभागाच्या नाबार्ड योजनेअंतर्गत यासाठी तब्बल ७ कोटी रुपयांचा निधी मंजूर झाला आहे.

नांदगाव येथील दक्षिण मांड नदीवर सन १९७६ मध्ये कृष्णा सहकारी साखर कारखान्याच्या माध्यमातून थोर विचारवंत यशवंतराव मोहिते आणि सहकारमहर्षी जयवंतराव भोसले यांच्या पुढाकारातून हा पूल उभारण्यात आला होता. त्यावेळी या पुलामुळे नांदगावसह परिसरातील अनेक गावांची दळणवळण व्यवस्था सुलभ झाली व ग्रामीण विकासाला मोठी चालना मिळाली. गेली अनेक दशके आजही याच पुलावरून वाहतूक सुरू आहे.

मात्र, कालांतराने हा पूल अत्यंत जीर्ण झाला असून, दगडी बांधकाम, कमी रुंदी व उंचीमुळे येथून वाहतूक करणे धोकादायक बनले होते. कारखान्याच्या माध्यमातून पूल उभारण्यात आल्याने पुढील काळात शासनाकडून दुरुस्तीसाठी नियमित निधी मिळू शकला नाही. परिणामी अनेकदा पुलावर दुहेरी वाहतूक बंद करून एकेरी वाहतूक सुरू ठेवावी लागत होती. दोन-तीन वर्षांपूर्वी झालेल्या अतिवृष्टीत पूल पाण्याखाली गेल्याने लोखंडी रेलिंग वाहून गेले होते, त्यामुळे अपघाताचा धोका वाढला होता.

त्यावेळी आमदार डॉ. अतुल भोसले यांनी तातडीने पुढाकार घेत नवीन लोखंडी रेलिंग बसवून ग्रामस्थांची गैरसोय दूर केली. याचवेळी त्यांनी या ठिकाणी कायमस्वरूपी, मजबूत आणि आधुनिक पुलाच्या उभारणीसाठी शासनस्तरावर पाठपुरावा सुरू केला. आमदार म्हणून निवडून आल्यानंतर त्यांनी या पुलाच्या गरजेचे महत्त्व राज्य शासनाच्या निदर्शनास आणले व सार्वजनिक बांधकाम मंत्री ना. शिवेंद्रसिंहराजे भोसले यांच्याकडे सातत्याने पाठपुरावा केला.

या मागणीची दखल घेत सार्वजनिक बांधकाम विभागाने नांदगाव येथे नवीन पुलाच्या उभारणीसाठी नाबार्ड योजनेतून ७ कोटी रुपयांचा निधी मंजूर केला आहे. नवीन पूल उभारल्यानंतर नांदगाव व परिसरातील ग्रामीण दळणवळणाला मोठी चालना मिळणार आहे. हा मार्ग जिल्हा जोडमार्ग असल्याने शिराळा, कालवडे–बेलवडे मार्गे राष्ट्रीय महामार्ग, तसेच जिंतीकडे जाणारी वाहतूक अधिक सोयीस्कर व सुरक्षित होणार आहे. याचा लाभ शेतकरी, विद्यार्थी, कामगार व सर्वसामान्य नागरिकांना होणार आहे.

या महत्त्वपूर्ण निधी मंजुरीबद्दल नांदगाव व परिसरातील ग्रामस्थांनी महायुती सरकारचे तसेच आमदार डॉ. अतुल भोसले यांचे विशेष आभार मानले आहेत.

विकासाचा साक्षीदार ठरणार पूल

ज्या ठिकाणी ५० वर्षांपूर्वी यशवंतराव मोहिते आणि जयवंतराव भोसले यांच्या प्रयत्नातून पूल उभारण्यात आला होता, त्याच जागी आता त्यांच्या पुढील पिढीतील आमदार डॉ. अतुल भोसले यांच्या पुढाकारातून ७ कोटी रुपयांच्या निधीतून नवा व भव्य पूल उभारला जाणार आहे. त्यामुळे हा पूल केवळ दळणवळणाचा मार्ग न राहता, पिढ्यान्‌पिढ्यांच्या विकासाचा साक्षीदार ठरणार आहे.