कराड/प्रतिनिधी : –
पुणे येथील वसंतदादा शुगर इन्स्टिट्यूट तथा व्हीएसआय पुणे या सहकारी साखर कारखान्यांच्या शिखर संस्थेमार्फत घेण्यात येणाऱ्या ऊस शेती ज्ञानयाग प्रशिक्षण कार्यक्रमासाठी यशवंतनगर, ता. कराड येथील सह्याद्रि सहकारी साखर कारखान्याचे सभासद-शेतकरी रवाना झाले.
या प्रशिक्षणार्थी सभासदांना कारखान्याचे कार्यकारी संचालक विश्वजीत शिंदे यांनी व्हीएसआय येथे मिळणाऱ्या ज्ञानाचा लाभ घ्यावा असे सांगून सर्व प्रशिक्षणार्थी सभासदांना शुभेच्छा दिल्या.
सह्याद्रि सहकारी साखर कारखान्याचे चेअरमन, माजी सहकार व पणन मंत्री बाळासाहेब पाटील यांच्या मार्गदर्शनाखाली कारखान्यामार्फत ऊस उत्पादक शेतकरी सभासदांना या प्रशिक्षणासाठी पाठवण्याची परंपरा सुरू आहे. उसाची व साखरेची उत्पादकता वाढवण्यासाठी शेतीमधील आधुनिक तंत्रज्ञान शेतकऱ्यांपर्यंत पोहोचणे व त्याचा शेतीमध्ये प्रत्यक्ष वापर होण्यासाठी व्हीएसआयमार्फत गेल्या ३४ वर्षांपासून प्रशिक्षण कार्यक्रमाचे आयोजन करण्यात येते.
प्रतिवर्षी सह्याद्री सहकारी साखर कारखान्याच्यावतीने ऊस उत्पादक पुरुष सभासदांना ज्ञानयाग व महिला सभासदांना ज्ञानलक्ष्मी या प्रशिक्षण कार्यशाळेसाठी पाठवण्यात येते. प्रशिक्षण कार्यशाळेमध्ये मिळालेल्या ज्ञानाचा ऊस शेतीमध्ये उपयोग करून उत्पादनात वाढ होण्यासाठी फायदा होत आहे. या प्रशिक्षण कार्यक्रमात व्हीएसआयचे शास्त्रज्ञ शेतीचे आधुनिक तंत्रज्ञान विषयावर प्रात्यक्षिकासह मार्गदर्शन करतात.
सह्याद्रि कारखान्याच्या वतीने व्हीएसआयच्या ज्ञानयाग प्रशिक्षण कार्यशाळेसाठी कारखान्याच्या ऊस उत्पादक शेतकरी सभासदांना रवाना करतेवेळी कराड पंचायत समितीचे माजी सदस्य रमेश चव्हाण, कारखान्याचे फायनान्स मॅनेजर जयेंद्र नाईक, शेती अधिकारी वसंतराव चव्हाण, ऊसविकास अधिकारी संजय चव्हाण, जी.व्ही. पिसाळ, भास्कर कुंभार यांच्यासह कारखान्याचे अधिकारी व प्रशिक्षणार्थी ऊस उत्पादक सभासद उपस्थित होते.
