कराड/प्रतिनिधी : – कराड शहराला ‘क्रीडानगरी’चा मानाचा मुकूट मिळवून देण्याचा माझा संकल्प असून, राज्य व केंद्र सरकारकडून मोठा निधी आणून हे स्वप्न पूर्ण करणार असल्याचे प्रतिपादन भाजपाचे जिल्हाध्यक्ष आ. डॉ. अतुलबाबा भोसले यांनी केले.
कराड नगरपालिका निवडणुकीत भाजपाचे नगराध्यक्षपदाचे उमेदवार विनायक पावसकर, तसेच प्रभाग एक मधील सुरेखा काटकर व संजय कांबळे यांच्या प्रचारार्थ मंगळवार पेठेत आयोजित कोपरा सभेत ते बोलत होते.
आ. भोसले म्हणाले, केंद्रात व राज्यात महायुतीचे सरकार असल्याने कराडच्या कायापालटाची मोठी संधी उपलब्ध झाली आहे. शहराच्या विकासासाठी आतापर्यंत २४४ कोटींचा निधी आणल्याचे सांगून त्यांनी स्मशानभूमी विकास, ओपन स्पेस सुधारणा, अंतर्गत रस्ते, संरक्षक भिंती अशा महत्त्वाच्या पायाभूत प्रकल्पांना गती देण्यात येणार असल्याचे स्पष्ट केले. ऑलिम्पिकपदक विजेते पैलवान खाशाबा जाधव यांनी कराडचा नावलौकिक वाढवला. त्या परंपरेत कराडला क्रीडा सुविधांचे उत्कृष्ट केंद्र बनविण्याचा संकल्प त्यांनी व्यक्त केला.
ते म्हणाले, भाजपाचे उमेदवार लोकांत मिसळणारे, समस्या ओळखणारे आणि नगरविकासाचा अनुभव असलेले आहेत. कराडच्या सर्वांगीण विकासाचा वेग वाढवायचा असेल, तर नगराध्यक्षपदासह सर्व प्रभागातील भाजपाच्या उमेदवारांना विजयी करावे, असे आवाहन त्यांनी केले.
सभेत उमेदवार विनायक पावसकर व संजय कांबळे यांनीही कराडच्या प्रगतीसाठी भाजपाला बहुमत देण्याचे नागरिकांना आवाहन केले. यावेळी माजी नगरसेवक राजेंद्र माने, संग्राम घोलप, इंद्रजीत घोलप, गणेश काटकर, विश्वजीत दसवंत, बजरंग दसवंत, महेश जाधव, विलास काटकर, रविराज शिंदे, पंकज पावसकर, किरण इनामदार, संदीप जोशी, जगन्नाथ जाधव यांच्यासह नागरिक मोठ्या संख्येने उपस्थित होते.
