कराड व मलकापूर नगरपरिषद सार्वत्रिक निवडणुकीसाठी नियुक्त कर्मचाऱ्यांचे पहिले प्रशिक्षण संपन्न

कराड/प्रतिनिधी : – 

कराड व मलकापूर सार्वत्रिक निवडणूक 2025 साठी नियुक्त कर्मचाऱ्यांचे पहिले प्रशिक्षण यशवंतराव चव्हाण स्मृती सदन कराड येथे संपन्न झाले.

याप्रसंगी कराड नगरपरिषदेचे निवडणूक निर्णय अधिकारी तथा प्रांताधिकारी अतुल म्हेत्रे, मलकापूर नगर परिषदेच्या निवडणूक निर्णय अधिकारी तथा तहसीलदार कल्पना ढवळे, कराडचे सहाय्यक निवडणूक निर्णय अधिकारी रोहिणी शिंदे, प्रशांत व्हटकर, मलकापूरचे सहाय्यक निवडणूक निर्णय अधिकारी कपिल जगताप, सहाय्यक ज्ञानदेव साळुंखे यांची उपस्थिती होती.

अतुल म्हेत्रे यांनी संगणकीय सचित्र सादरीकरणाच्या माध्यमातून नियुक्त कर्मचाऱ्यांना प्रशिक्षण दिले. मतदान कर्मचारी नियुक्ती संबंधी कायदेशीर तरतुदी, विधानसभा, लोकसभा निवडणूक व नगरपरिषदेच्या निवडणुकीत असलेला फरक, मतदानाच्या आदल्या दिवशी साहित्य घेताना तपासून घ्यावयाच्या बाबी, मतदान केंद्राची रचना, मतदान यंत्रांचे बॅलेट युनिट व कंट्रोल युनिट जोडण्याची प्रक्रिया, अभिरूप मतदान प्रक्रिया, मतदान यंत्र मोहोरबंद करण्याची प्रक्रिया, प्रतिनिधींकडून विविध घोषणापत्रे स्वाक्षरी करून घेण्याची प्रक्रिया, मतदान यंत्रे बदलण्याची व आवश्यकता भासल्यास पूर्ण करण्याची प्रक्रिया, मतदान यंत्रातून दर्शविल्या जाणाऱ्या विविध सूचनांचा अर्थ, मतदान अधिकार्‍यांना नेमून द्यावयाची कर्तव्ये, मतदान केंद्रात प्रवेश करण्यास पात्र व्यक्ती, मतदारांची ओळख पटवण्यासाठी आवश्यक पुराव्यांची यादी, अंध, दिव्यांग वृद्ध, दुबार, प्रॉक्सी मतदार व पर्दानशीन मतदारांची ओळख पटविण्यासाठी केलेली तरतुद, विविध लिफाफे भरण्याची व मोहोरबंद करण्याची प्रक्रिया, 17 बी मतदार पुस्तिका व 17 सी नोंदवलेल्या मतांचा हिशोब, मतदान केंद्राध्यक्षाची डायरी, मतदान प्रक्रिया बंद करताना करावयाची प्रक्रिया व यासंबंधी असलेली घोषणपत्रे इ. बाबतचे सविस्तर प्रशिक्षण निवडणूक निर्णय अधिकारी अतुल म्हेत्रे व कल्पना ढवळे यांनी नियुक्त कर्मचाऱ्यांना दिले.

प्रशिक्षणाच्या दुसऱ्या टप्प्यात शिवाजी विद्यालय, कराड येथे नियुक्त कर्मचाऱ्यांना प्रत्यक्ष मतदान यंत्र हाताळण्याचेही प्रशिक्षण देण्यात आले.