कोअर कमिटीचा निर्णय अंतिम, फसवणूक करण्याचा प्रश्नच नाही – आमदार अतुल भोसले

कराड/प्रतिनिधी : –

विधानसभेला माजी उपनगराध्यक्ष जयवंतराव पाटील यांनी मला मदत केली होती. मात्र नगराध्यक्षपदासाठी 18 जण इच्छुक होते. पक्षाने कोर कमिटीमार्फत अनुभवी उमेदवाराला संधी दिली. आमदार म्हणून कुणालाही शब्द देण्याचा मला अधिकार नव्हता. त्यामुळे कोणाच्या फसवणुकीचा प्रश्नच येत नाही, असे स्पष्ट मत आमदार अतुलबाबा भोसले यांनी व्यक्त केले.

कराड नगरपालिकेच्या पंचवार्षिक निवडणुकीसाठी भारतीय जनता पार्टीच्या प्रचाराचा शुभारंभ मंगळवारी यशवंतराव चव्हाण यांच्या समाधीस्थळी आमदार भोसले यांच्या उपस्थितीत करण्यात आला. यावेळी नगराध्यक्ष पदाचे उमेदवार ज्येष्ठ नेते विनायक पावसकर, बंडा काका डूबल, अरुण जाधव, शारदा जाधव, अतुल शिंदे, इंद्रजीत गुजर, भाग्यश्री साळुंखे स्मिता हुलवान इतर मान्यवर उपस्थित होते यानंतर माध्यमांशी संवाद साधताना ते बोलत होते.

मलकापूर नगरपालिकेत भारतीय जनता पार्टीचे पाच उमेदवार बिनविरोध निवडून आल्याने पक्षाचे मनोबल उंचावले असून, शहराच्या विकासाच्या दिशेने मलकापूरची वाटचाल वेग घेत असल्याचे चित्र स्पष्ट होत असल्याचा आनंद आमदार अतुल भोसले यांनी व्यक्त केला. उर्वरित जागाही मतदार बहुमताने निवडून देत नगराध्यक्षपदाचा उमेदवारही विजयाच्या ताकदीने पुढे येईल. त्याचबरोबर कराडचा नगराध्यक्ष ही भाजपचा निवडून येणार असून या ठिकाणी पक्षाला मोठे यश येईल, असा विश्वास त्यांनी व्यक्त केला.

याप्रसंगी या निवडणुकीत काँग्रेसचे आव्हान वाटते का? या प्रश्नावर भोसले म्हणाले, काँग्रेस नगरपालिका निवडणुकीत उभी राहणार की नाही? याबाबतच शंका वाटते. त्यांचा एक गट लढणार, तर दुसरा गट लढणार नाही, अशी परिस्थिती आहे. देशातील जुनी पार्टी आज इतकी गोंधळलेल्या भूमिकेत आहे की, युवक काँग्रेसच्या प्रदेशाध्यक्षांच्या सख्ख्या भावालाही काँग्रेसच्या तिकिटावर अर्ज भरता आला नाही. हे त्यांच्या अंतर्गत विसंवादाचे द्योतक आहे. लोकशाही आघाडी, यशवंत विकास आघाडी आणि शिवसेना शिंदे गटाच्या आघाडीशीच आमचा प्रमुख सामना होणार असल्याचे त्यांनी सांगितले.

विनायक पावसकर यांच्या उमेदवारीबाबत बोलताना ते म्हणाले, गेल्या 35 वर्षांपासून पक्षासाठी पावसकर यांनी सातत्याने काम केले. कठीण काळातही त्यांनी भाजपाचे चिन्ह पुढे नेले. विधानसभेत त्यांनी प्रामाणिकपणे पक्षाचे काम केले. त्यामुळेच त्यांची निवड न्याय्य आहे. कराडचा नगराध्यक्ष भाजपचाच होईल, असा विश्वास त्यांनी व्यक्त केला.

येथील उपजिल्हा रुग्णालय अत्याधुनिक करण्यासाठी, ट्रामा केअर सेंटर आणि रीड डेव्हलपमेंट, शहरातील रस्ते, वाहतूक, पार्किंग, पाणीपुरवठा या मूलभूत सुविधांचे नियोजन सुधारण्यासाठी निधी उपलब्ध करून देण्याचे प्रयत्न सुरू आहेत. तसेच प्रीतीसंगम बागेचे रीड डेव्हलपमेंट, नेकलेस रोड प्रकल्प, नदीकाठ संरक्षण भिंत बांधणी या सर्वांचा समावेश असलेला मेगाप्लॅन मुख्यमंत्री देवेंद्र फडणवीस यांच्याकडे सादर करण्यात आला असून, प्रस्ताव प्रगतिपथावर आहे.

मलकापूरमध्ये पाच नगरसेवक बिनविरोध निवडून आले, ही आमच्या कामाची पावती आहे. जुन्या – नव्या कार्यकर्त्यांना सोबत घेऊन काम करण्याचा प्रयत्न आहे. मनोहर शिंदे आणि अशोकराव थोरात यांना 42 वर्षांनी एकत्र आणण्याचा प्रयत्न केला. कराड – मलकापूर दोन्ही ठिकाणी नवीन चेहऱ्यांना संधी दिली आहे. मलकापूर आधुनिक शहर उभारणे, हेच आमचे उद्दिष्ट असल्याचे त्यांनी सांगितले.