कृष्णा कारखान्याला सर्वोत्कृष्ट डिस्टीलरीचा राष्ट्रीय पुरस्कार प्रदान

कोल्हापूर येथे भारतीय शुगर संस्थेच्यावतीने राष्ट्रीय साखर परिषद आणि वार्षिक पारितोषिक वितरण सोहळा उत्साहात पार पडला. या सोहळ्यात राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील यांच्या हस्ते कृष्णा कारखान्याला सर्वोत्कृष्ट डिस्टीलरीसाठी राष्ट्रीय पुरस्काराने गौरविण्यात आले. याप्रसंगी भारतीय शुगरचे चेअरमन विक्रमसिंह शिंदे व मुख्य संचालन अधिकारी संग्रामसिंह शिंदे यांच्यासह मान्यवरांची प्रमुख उपस्थिती होती.

कृष्णा कारखान्याचे चेअरमन डॉ. सुरेश भोसले यांच्या मार्गदर्शनाखाली साखर उत्पादनासोबतच उपपदार्थ निर्मितीवर भर दिला आहे. कारखान्यात उच्च प्रतीचे इथेनॉल, देशी मद्य, रेक्टीफाईड स्पिरिट इत्यादींचे उत्पादन घेतले जाते. कृष्णा कारखान्याच्या डिस्टीलरीमध्ये सर्वोच्च फर्मन्टेशन आणि डिस्टलेशन कार्यक्षमतेसह १२८ % प्रकल्प क्षमतेचा वापर केला आहे. तसेच निर्धारित वेळेत ऑईल कंपन्यांना संपूर्ण इथेनॉल पुरवठा यशस्वीरित्या पूर्ण केला आहे. त्याचबरोबर सर्व नियामक आणि ग्राहक मानकांची पूर्तता करून, रेक्टिफाइड स्पिरिटची उच्च गुणवत्ता सातत्याने राखली आहे. या सर्व कार्याची नोंद घेत भारतीय शुगर  संस्थेने हा पुरस्कार कृष्णा कारखान्यास प्रदान केला.

या पुरस्कार सोहळ्याला कारखान्याचे व्हाईस चेअरमन जगदीश जगताप, संचालक लिंबाजी पाटील, दयानंद पाटील, संजय पाटील, बाबासो शिंदे, बाजीराव निकम, शिवाजी पाटील, जे.डी.मोरे, विलास भंडारे,वसंतराव शिंदे, अविनाश खरात, श्रीरंग देसाई, दीपक पाटील, मॅनेजिंग डायरेक्टर बाजीराव सुतार, प्रमोद पाटील, मनोज पाटील, वैभव जाखले, जनरल मॅनेजर डिस्टीलरी विकास आभाळे आदींसह मान्यवर, सर्व अधिकारी व कर्मचारी उपस्थित होते.