शिवतीर्थावर वेदमंत्रांच्या गजरात शिवमूर्तीला अभिषेक

कराड/प्रतिनिधी : –

ढोल-ताशांच्या गजरात, भगव्या पताकांनी सजलेल्या कराडनगरीत ३५२ वा शिवराज्याभिषेक सोहळा सोमवारी (दि. ९ जून) मोठ्या उत्साहात आणि पारंपरिक पद्धतीने साजरा करण्यात आला. त्यानंतर सायंकाळी ५ वाजता पारंपरिक वाद्यवृंदाच्या गजरात शिवरायांचा पालखी सोहळा व शहरातील देवदर्शन यात्रेस सुरवात करण्यात आली.

प्रारंभी, श्री शिवतीर्थ दत्त चौकात छत्रपती शिवाजी महाराजांच्या अश्वारूढ पुतळ्यास पुष्पहार अर्पण करण्यात आला. त्यानंतर वेदमंत्रांच्या गजरात प्रतीकात्मक शिवमूर्तीचा अभिषेक करण्यात आला. यावेळी झालेल्या शिवघोषांनी संपूर्ण परिसर शिवमय झाला होता.

हा ऐतिहासिक आणि सांस्कृतिक वारसा जपणारा शिवराज्याभिषेक सोहळा श्री शिवप्रतिष्ठान हिंदुस्थान, कराड यांच्या वतीने दरवर्षी तिथीप्रमाणे साजरा केला जातो. यंदाही ज्येष्ठ शुद्ध त्रयोदशीच्या दिवशी, सोमवारी (दि. ९) जून रोजी सकाळी ७.४५ वाजता या सोहळ्याला सुरुवात झाली.

सर्वप्रथम छत्रपती शिवाजी महाराजांच्या पुतळ्याला पुष्पहार अर्पण करण्यात आला. त्यानंतर कराड दक्षिणचे आमदार डॉ. अतुलबाबा भोसले यांच्या हस्ते प्रतीकात्मक शिवमूर्तीस वैदिक मंत्रोच्चारासह विधिवत अभिषेक करण्यात आला. त्यानंतर ११ दाम्पत्यांच्या हस्ते शिवपूजन करण्यात आले.

याप्रसंगी पारंपरिक पोशाखात महिला, युवक, युवती आणि विविध वयोगटातील नागरिक मोठ्या संख्येने सहभागी झाले होते. श्री शिवप्रतिष्ठानच्या धारकऱ्यांसह कराड व मलकापूर शहर, तसेच परिसरातील शेकडो नागरिकांनी सहभाग नोंदवला.

“छत्रपती शिवाजी महाराज की जय”, “धर्मवीर संभाजी महाराज की जय”, “जय भवानी, जय शिवाजी”, “भारत माता की जय” अशा जयघोषांनी संपूर्ण शिवतीर्थ परिसर दणाणून गेला. या सोहळ्याच्या पार्श्वभूमीवर शिवतीर्थ परिसर आकर्षक भगव्या पताकांनी, फलकांनी आणि पारंपरिक सजावटीने सजवण्यात आला होता. विविध ठिकाणी रांगोळ्या आणि फुलांची आरास करण्यात आली होती. या साऱ्या सजावटीमुळे शिवतीर्थ परिसर संपूर्णपणे शिवमय झाला होता.

त्यानंतर सोमवारी सायंकाळी ५ वाजता शिवतीर्थ दत्त चौकात छत्रपती शिवाजी महाराजांच्या प्रतिमेचे मान्यवरांच्या हस्ते विधीवत पूजन, तसेच भगव्या ध्वजाचेही पूजन करून प्रेरणामंत्र म्हणण्यात आला. हा एकत्रिकरण समारंभ पारंपरिक वाद्यवृंदाच्या उपस्थितीत झाला. त्यानंतर शिवरायांच्या पालखी सोहळा व शहरातील देवदर्शन यात्रेस प्रारंभ करण्यात आला. ही पालखी मिरवणूक व देवदर्शन यात्रेचा शिवतीर्थ दत्त चौकातून आझाद चौक, अकरा फुटी मारुती, नेहरू चौक, पाण्याच्या टाकीपासून हेड पोस्ट ते परत शिवतीर्थ असा मार्ग होता. शिवतीर्थावर ध्येयमंत्राने या सोहळ्याची सांगता करण्यात आली. यामध्ये पारंपरिक पोशाखात, भगवा फेटा व पंढरी टोपी घालून युवक, विविध गटातील नागरिक सहभागी झाले होते.

शिवराज्याभिषेक कराडच्या सांस्कृतिक जाणीवेचे प्रतीक

या वर्षीही नागरिकांनी हा सोहळा अत्यंत भक्तिभावाने आणि साजशृंगारात साजरा केला. शिवाजी महाराजांच्या स्वराज्य स्थापनेच्या स्मृतींना उजाळा देत नव्या पिढीसमोर इतिहासाची उजळणी करून देणारा हा सोहळा कराड शहराच्या सांस्कृतिक जाणीवेचे प्रतीक ठरला आहे.