३५२ वा शिवराज्याभिषेक सोहळा कराडमध्ये उत्साहात होणार साजरा

कराड/प्रतिनिधी : –

“राष्ट्रांत निर्मळ अवघा शिवसूर्य जाळ” या घोषणेने आणि पारंपरिक ढोल-ताशांच्या गजरात कराडनगरीत ३५२ वा शिवराज्याभिषेक सोहळा मोठ्या उत्साहात आणि पारंपरिक पद्धतीने साजरा होणार आहे. सोमवार (दि. ९) जून २०२५ रोजी (ज्येष्ठ शुद्ध त्रयोदशी) श्री शिवतीर्थ दत्त चौक, कराड येथे हा सोहळा संपन्न होणार आहे.

या ऐतिहासिक आणि सांस्कृतिक सोहळ्याचे आयोजन प्रतिवर्षीप्रमाणे यंदाही विविध समाज, संघटनांच्या वतीने करण्यात आले आहे.

सोमवारी सकाळी ७ ते ८ वाजता छत्रपती शिवाजी महाराजांच्या मूर्तीस वैदिक मंत्रोच्चारात अभिषेक व पूजा करण्यात येणार आहे. यामध्ये विविध पुजाअर्चा विधी पार पडतील.

दुपारी ४.३० वाजता छत्रपती शिवाजी महाराजांच्या प्रतिमेचे विधीवत पूजन, त्यानंतर पालखी सोहळा आणि देवदर्शन यात्रा आयोजित करण्यात आली आहे. एकत्रिकरण समारंभ पारंपरिक वाद्यवृंदाच्या उपस्थितीत भव्यतेने पार पडणार आहे.

कार्यक्रमात सहभागी होणाऱ्या नागरिकांनी पारंपरिक पोशाखात, भगवा फेटा घालून उपस्थित राहावे, असे आवाहन आयोजकांच्या वतीने करण्यात आले आहे.

हा सोहळा केवळ महाराजांच्या राज्याभिषेकाची आठवण करून देणारा नाही, तर तो छत्रपती शिवाजी महाराजांच्या आदर्श विचारांचा आणि स्वराज्य संकल्पनेचा पुनर्प्रत्यय देणारा उत्सव आहे. त्यामुळे कराडसह परिसरातील नागरिकांनी मोठ्या संख्येने उपस्थित राहून या ऐतिहासिक क्षणाचे साक्षीदार व्हावे, असे आवाहन करण्यात आले आहे.