सह्याद्रिचे सभासद विद्यमान चेअरमनना माजी चेअरमन करतील – आ. मनोजदादा घोरपडे 

धनगरवाडी योजनेचे जलपूजन उत्साहात, पुढील दोन वर्षातच मतदारसंघाचे नंदनवन करू

कराड/प्रतिनिधी : –

कराड उत्तर विधानसभा मतदारसंघात 35 वर्षांची एकाच घरातील सत्ता उलथवून जनतेने ऐतिहासिक परिवर्तन केले. त्यामुळे होऊ घातलेल्या सह्याद्रि कारखान्याच्या निवडणुकीतही शंभर टक्के परिवर्तन होणारच, असा निर्धार व्यक्त करत कराड उत्तरच्या जनतेने तत्कालीन आमदारांना जसे माजी आमदार केले. तसे कारखान्याच्या निवडणुकीतही सह्याद्रिचे सभासद विद्यमान चेअरमन यांना माजी चेअरमन करतील, असा विश्वास आ. मनोजदादा घोरपडे यांनी व्यक्त केला.

गोसावेवाडी (ता. कराड) येथे ग्रामस्थांनी आयोजित केलेल्या धनगरवाडी योजनेच्या जलपूजन कार्यक्रमात ते बोलत होते अध्यक्षस्थानी ज्येष्ठ नागरिक शिवाजी जगदाळे होते. यावेळी महानंदाचे संचालक वसंतराव जगदाळे, कोयना दूध संघाचे संचालक संपतराव इंगवले, कुलदीप क्षिरसागर, भाजपचे जिल्हा उपाध्यक्ष सुरेश पाटील, प्रमोद गायकवाड, रणजीत कदम, उमेश चव्हाण, उपसरपंच संतोष शिंदे, बाळासाहेब जाधव, रवींद्र सूर्यवंशी, किसन पाटील, संदीप जगदाळे, शिवाजी जगदाळे आदींची प्रमुख उपस्थिती होती.

आ. घोरपडे म्हणाले, मतदारसंघात काम करताना मला गावातील मतांची लिस्ट बघून काम करण्याची गरजच नाही. प्रत्येक गावाने मला भरघोस प्रेम दिले आहे. यापूर्वी सत्ताधाऱ्यांनी केवळ आडवा-आडवी, जिरवा-जिरवी याशिवाय दुसरा धंदा केला नाही. मात्र, जनतेने त्यांची आमदारकीची कवचकुंडले काढून घेतली. त्यामुळे येत्या निवडणुकीत सह्याद्रिचे सभासद त्यांचा करेक्ट कार्यक्रम करतील. लोकाभिमुख प्रशासन राबवून जनतेची कामे करून विकासाच्या दिशेन मतदारसंघ घेऊन जाताना पुढील दोन वर्षातच मतदारसंघाचे नंदनवन करू, अशी ग्वाहीही त्यांनी यावेळी दिली.

कुलदीप क्षीरसागर म्हणाले, कराड उत्तर मतदारसंघात नियतीने बदल घडवून आणला आहे. त्यामुळेच कल्पक दूरदृष्टी असलेल्या नेतृत्वाच्या हस्ते आज पाणीपूजन झाले. खासदार उदयनराजे भोसले यांच्या मार्गदर्शनाखाली आमदार मनोज घोरपडे मतदारसंघाचा विकासाचा बॅकलॉग नक्कीच भरून काढतील.

प्रमोद गायकवाड म्हणाले, जनतेने विधानसभेप्रमाणे सह्याद्रि कारखान्याच्या निवडणुकीतही विद्यमान चेअरमन यांना माजी चेअरमन करावे, असे आवाहन केले. प्रास्ताविक लालासो शिंदे यांनी स्वागत उपसरपंच संतोष शिंदे, हणमंत जाधव यांनी आभार मानले.

कार्यक्रमास मारुती घोलप, प्रशांत घोलप, बाळासाहेब कांबीरे, कृष्णत शिंदे, संजय पवार, वैभव इंगळे, श्रीकांत पाटील, संभाजी पाटील, अमर पाटील, अशोक जाधव, विकास निकम ,नितीन पवार, नितीन जाधव, अभिजीत पवार, सागर शिंदे, सुमित गोसावी, अजित पवार, विशाल घाडगे, अजित जाधव आदींसह परिसरातील विविध गावातील मान्यवर, ग्रामस्थ, महिला बहुसंख्येने उपस्थित होत्या.

स्वाभिमानी सखी मंच सदैव महिलांच्या पाठीशी

कराड उत्तर मतदारसंघात स्वाभिमानी सखी मंचच्या माध्यमातून सुमारे 40 हजार महिला संघटित झाल्या आहेत. त्यांची बचत गटाची कामे, विविध समस्या सोडवण्यासाठी स्वाभिमानी सखी मंच महिलांच्या सदैव पाठीशी राहील. मुख्यमंत्री देवेंद्र फडणवीस यांच्या माध्यमातूनही लाडकी बहीण योजनेतून महिलांना आर्थिक सक्षम करण्याबरोबरच आत्मसन्मान वाढवण्याचे काम केले असल्याचेही आमदार घोरपडे यांनी यावेळी सांगितले.