हिवाळी अधिवेशनात झोपडपट्टीच्या पुनर्वसनाबाबतचा प्रस्ताव मंजूर करुन आणणार – आ.डॉ. अतुलबाबा

कराड/प्रतिनिधी : –

कराड शहरातील पाटण कॉलनीत गेल्या ५० वर्षांहून अधिक काळ अनेक लोकांना झोपडपट्टीत राहावे लागत आहे. या झोपडपट्टीधारकांच्या पुनर्वसनाचा प्रश्न मार्गी लावून, त्यांना हक्काची घरे मिळवून देण्यास कराड दक्षिणचे नूतन आमदार डॉ. अतुलबाबा भोसले यांनी प्राधान्य दिले आहे. यादृष्टीने आज त्यांनी या परिसराची पाहणी करुन, या झोपडपट्टीच्या पुनर्वसनाबाबतचा प्रस्ताव तातडीने तयार करण्याचे निर्देश नगरपालिका प्रशासनाला दिले. हा प्रस्ताव पुढील आठवड्यात होणाऱ्या हिवाळी अधिवेशनात मंजूर करुन आणण्याची ग्वाही आ.डॉ. अतुलबाबा भोसले यांनी यावेळी उपस्थितांना दिली. त्यामुळे झोपडपट्टीवासीयांना पक्की घरे मिळण्याचे स्वप्न लवकरच पूर्णत्वास जाणार आहे.

विधानसभा निवडणुकीत कराड दक्षिण विधानसभा मतदारसंघाचे आ. डॉ. अतुलबाबा भोसले यांनी निवडून आल्यानंतर पाटण कॉलनीतील झोपडपट्टीचा प्रश्न मार्गी लावण्याचे अभिवचन दिले होते. त्यानुसार विधानसभा निवडणुकीत मिळालेल्या घवघवीत यशानंतर आ. डॉ. अतुलबाबा भोसले यांनी तातडीने शासकीय विभागांची आढावा बैठक घेऊन, कराड दक्षिणमधील सर्वच झोपडपट्टींच्या पुनर्वसनाबाबत सविस्तर अहवाल देण्याचे निर्देश दिले होते.

त्यानुसार आज त्यांनी नगरपालिकेच्या अधिकाऱ्यांसमवेत पाटण कॉलनी येथील झोपडपट्टी परिसराची प्रत्यक्ष पाहणी करत, इथल्या नागरिकांशी संवाद साधून त्यांच्या समस्या जाणून घेतल्या. यावेळी बोलताना ते म्हणाले, गेल्या ५० वर्षांपासून आपल्याला पक्क्या घरांपासून वंचित ठेवण्यात आले. आजच्या या बैठकीच्या निमित्ताने आपण सर्व झोपडपट्टीधारकांना पक्की घरे देण्याची मूहूर्तमेढ करत आहोत. येत्या १० दिवसांत याबाबतचा प्रस्ताव नागपूर येथे होणाऱ्या हिवाळी अधिवेशनात मंजूर करुन घेण्याची जबाबदारी माझी राहील. विधानसभा निवडणुकीत जो शब्द दिला तो पाळून लवकरच सर्वांना पक्की घरे देण्याबाबतची कार्यवाही केली जाईल, अशी ग्वाही त्यांनी दिली.

यावेळी कराडचे मुख्याधिकारी शंकर खंदारे, माजी उपनगराध्यक्ष राजेंद्रसिंह यादव, माजी नगरसेवक आप्पा माने, सुहास जगताप, घनश्याम पेंढारकर, महादेव पवार, उमेश शिंदे यांच्यासह नगरपालिकेचे अधिकारी व नागरिक मोठ्या संख्येने उपस्थित होते.