मनोज घोरपडे यांचे जोरदार शक्तीप्रदर्शन

कराड उत्तर विधानसभा मतदारसंघातील महायुतीचे अधिकृत उमेदवार मनोज घोरपडे यांनी शक्तीप्रदर्शन करत सोमवारी आपला उमेदवारी अर्ज दाखल केला. येथील कृष्णा नाक्यावरून दत्त चौकापर्यंत भव्य शक्तीप्रदर्शन करत समर्थकांनी जोरदार घोषणाबाजी करत रॅली काढली.

त्यानंतर येथील यशवंतराव चव्हाण बहुउद्देशीय सभागृहात खा. उदयनराजे भोसले यांच्या उपस्थितीत निवडणूक निर्णय अधिकारी विक्रांत चव्हाण यांच्याकडे आपला उमेदवारी अर्ज दाखल केला.

दरम्यान, रॅलीमध्ये  जिल्हाध्यक्ष धैर्यशील कदम, प्रदेश सरचिटणीस रामकृष्ण वेताळ, विक्रम पावसकर, चित्रलेखा माने-कदम, सुनील तात्या काटकर, भिमरावकाका पाटील महेशबाबा जाधव, वासुदेव माने, शंकरकाका शेजवळ, अंजलीताई जाधव, सीमा घार्गे, सुरेशतात्या पाटील, संपत, जाधव, मोहनबापू चरेगावकर, प्रमोद गायकवाड, अक्षय जगदाळे, चंद्रकांत मदने, सुरेश कुंभार, प्रकाश पवार, धनाजी पाटील, राजेश घाडगे, एड. विजयसिंह शिंदे, विकास गायकवाड, रणजित माने, ऋषिकेश तुपे, सागर शिवदास, अण्णासाहेब निकम, तात्यासो साबळे, माधवराव गुरव, समृद्धीबाबा जाधव, राजू ढाणे, तुषार निकम, प्रदीप साळुंखे, सचिन बेलागडे, आनंदराव थोरात, कराड उत्तरमधील माता भगिनी, कार्यकर्ते मोठ्या संख्येने उपस्थित होते.

याप्रसंगी उदयनराजे भोसले म्हणाले, मनोज घोरपडे यांनी मतदारसंघात भारतीय जनता पार्टीच्या माध्यमातून अनेक विकासकामे आणली आहेत. त्यांनी केलेल्या विकासकामांमुळे ते निवडून आल्यात जमा आहेत. तसेच मनोज घोरपडे, धैर्यशील कदम आणि रामकृष्ण वेताळ हे एकत्र मिळून प्रयत्न करतील.

मनोज घोरपडे म्हणाले, कराड उत्तर विधानसभा मतदार संघातील धनगरवाडी-हणबरवाडी योजनेसाठी 2014 पासून निधी आणण्यासाठी आपण प्रयत्न केला आहे. या योजनेचा पहिला टप्पा पूर्ण होत आहे. तसेच पश्चिम भागातील तारळी उपसा प्रकल्प, तसेच हिंगोली उपसा सिंचन योजनेतून 100 मीटर हेडपर्यंत पाणी पोहोचवण्याची योजना प्रस्तावित आहे.  मतदारसंघाचा संपूर्ण विकास हाच आमचा अजेंडा राहील. उत्तरेतील सर्व नेत्यांच्या समन्वयातून आपल्यावर भारतीय जनता पक्षाने ही जबाबदारी दिली असून सर्वांच्या सहकार्याने एकदिलाने आम्ही करू, असेही त्यांनी सांगितले.

कराड उत्तर विधानसभा मतदारसंघातील महाविकास आघाडीचे अधिकृत उमेदवार आ. बाळासाहेब पाटील आणि महायुतीचे उमेदवार मनोज घोरपडे या दोन्ही गटाकडून उमेदवारी अर्ज दाखल करण्यासाठी सोमवारी भव्य शक्तीप्रदर्शन करत रॅली काढण्यात आली. येथील दत्त चौकात दोन्ही गट समोरासमोर आल्याने याठिकाणी घोषणाबाजी करण्यावरून दोन्हीकडील कार्यकर्त्यांमध्ये वादावादी झाली. त्यामुळे तणावाचे वातावरण निर्माण झाले होते. परंतु, पोलीस प्रशासनाने वेळीच हस्तक्षेप केल्याने तणाव निवळला.