जनकल्याण पतसंस्थेची 29 वी वार्षिक सभा उत्साहात 

सदर सभेच्या नोटीसीचे वाचन व सूत्रसंचालन संस्थेचे मुख्य कार्यकारी अधिकारी विनायक फडके यांनी केले. सभेसमोर ठेवलेल्या सर्व विषयांना सभासदांनी एकमताने मान्यता दिली.

३१ मार्च २०२४ अखेर संपलेल्या आर्थिक वर्षाअखेर संस्थेकडे ५४५ कोटींच्या ठेवी जमा झाल्या असून रुपये ३६८ कोटी इतकी कर्जे वितरीत केली आहेत. संस्थेचा एकत्रीत व्यवसाय ९१३ कोटी इतका झाला असून संस्थेने २७० कोटी इतकी सुरक्षीत गुंतवणूक केली आहे. संस्थेस ३१ मार्च २०२४ अखेर रुपये ७ कोटी ३७ लाखाहून अधिक तरतूदीअंती नफा झालेला आहे. संस्थेने सहकारी पतसंस्थांच्या नियामक मंडळाने लागू केलेल्या सी.आर.ए.आर. १७.६६,% सी.आर.आर.३.४८ % व एस.एल.आरचे २७.५१ टक्के आवश्यक प्रमाण राखले आहे. तसेच अकौंटींग स्टैंडर्ड मधील तरतूदींचे पालन केले असून संस्थेस सन २०२४ अखेर संपलेल्या आर्थिक वर्षाकरीता वैधानिक लेखापरीक्षकांकडून “अ” वर्ग मिळालेला आहे.

संस्थेचे अध्यक्ष चंद्रशेखर देशपांडे यांनी मनोगतात संस्थेच्या प्रगतीचा व संस्थेने केलेल्या कार्याचा आढावा सादर केला. या अहवाल वर्षामध्ये नियोजनबध्द काम करताना व्यवसाय वृध्दी व नफा वाढ हा एक दृष्टीकोन महत्वाचा होता. कर्ज मंजुरी व जलद वितरणाच्या प्रक्रियेने कर्ज व्याज उत्पन्न वाढले आहे. तसेच अहवाल वर्षात सुमारे रु. २ कोटीपर्यंत गुंतवणुकीवर वाढीव उत्पन्न आपण मिळवले आहे, असे मत व्यक्त केले.

संस्था इ-सर्व्हिसेस माध्यमातून वीजबिल भरणे, विविध टॅक्सेस, लाईफ इन्शुरन्स, हेल्थ इन्शुरन्स, मोटर इन्शुरन्स, अशा विविध प्रकारच्या विमा पॉलिसीज उतरवणे, फास्ट टॅग रिचार्जेस इ. सेवा देत आहे त्याचा सभासद बहुसंख्येने लाभ घेत आहेत.

अहवाल वर्षात शाखा चाकण, पुणे येथे संस्थेच्या १७ व्या शाखेचे उद्दघाटन सोहळा संपन्न झाल्याचे सांगत पुढील वर्षामध्ये आणखी ४ शाखा ग्राहकांच्या सेवेत रुजू व्हाव्यात या करीता संचालक मंडळ प्रयत्नशील असल्याचे त्यांनी सांगितले. तसेच महिलांसाठी विशेष चारचाकी कर्ज योजना ७ वर्षा करीता व्याज दर ९.५० टक्के या अल्पदरात सुरु केली असून त्याचा लाभ सर्व सभासद व ग्राहक यांनी घ्यावा असे अहवान केले.

आर्थिक वर्षाकरीता सभासदांना १० टक्के एवढा डिव्हीडंड दिला जात असल्याचे त्यांनी जाहीर केले. सभासदांच्या पाठींब्यामुळे संस्थेचा एकत्रीत व्यवसाय रुपये १००० कोटींच्या समीप आहे, सभासदांनी गेली २९ वर्ष संस्थेच्या संचालक मंडळावर दाखविलेल्या विश्वास व दिलेल्या पाठींब्याबद्दल त्यांनी सभासदांचे आभार व्यक्त केले. तसेच संचालक मंडळाने दिलेल्या योगदानाबद्दल संचालक मंडळाचे देखील आभार मानले.

यावेळी संस्थेचे उपाध्यक्ष डॉ. मिलींद पेंढारकर, संचालक डॉ. प्रकाश सप्रे, सी.ए. शिरीष गोडबोले, एकनाथ फिरंगे, हिंदुराव डुबल, जितेंद्र शहा, मोहन सर्वगोड, डॉ. सुचिता हुद्देदार, सौ. वर्षा कुलकर्णी, सौ. पुनम वास्के, दिपक जोशी, प्रविण देशपांडे, अभिजीत चाफेकर, सुनिल कुलकर्णी, सी.ए. आशुतोष गोडबोले, अशोक आटकर उपस्थित होते.

संस्थेच्या संचालिका डॉ. सुचिता हुद्देदार यांनी सभेस उपस्थित संस्थेचे सर्व सभासद, सल्लागार, कायदेविषयक सल्लागार, मूल्यांकनकार, कर्मचारी तसेच सभा यशस्वी होण्यासाठी ज्यांचे सहकार्य लाभले त्या सर्वांचे आभार मानले.