घोणशीच्या उपसरपंचपदी डॉ. शशिकांत वायदंडे बिनविरोध

कराड/प्रतिनिधी : –

घोणशी, ता. कराड ग्रामपंचायतीच्या उपसरपंचपदी डॉ. शशिकांत वायदंडे यांची बिनविरोध निवड झाली आहे. या निवडीनंतर आ. बाळासाहेब पाटील गटाच्या समर्थकांनी गुलालाची उधळण करून जल्लोष केला. तसेच पेढे वाटून आनंदोत्सव साजरा करण्यात आला.

राज्याचे माजी सहकार मंत्री तथा सातारा जिल्ह्याचे माजी पालकमंत्री, कराड उत्तरचे आ. बाळासाहेब पाटील यांच्या मार्गदर्शनाखाली व सह्याद्रिचे कारखान्याचे संचालक माणिकराव पाटील यांच्यासह सहकाऱ्यांच्या नेतृत्वाखाली घोणशी ग्रामपंचायतीचा कारभार सुरू आहे. दरम्यान, तीन वर्षांपूर्वी जानाई सह्याद्री ग्रामविकास पॅनेलने विजय मिळवून सत्तांतर घडवले होते. त्यानंतर सरपंचपदी सुवर्णा अडसुळे यांना, तर उपसरपंचपदी अनुक्रमे संजय पिसाळ, सुनीता पाटील यांना काम करण्याची संधी मिळाली होती. सुनीता पाटील यांनी आपल्या उपसरपंचपदाचा राजीनामा दिल्याने त्यांच्या जागी नुकतीच डॉ. शशिकांत वायदंडे यांची निवड झाली. निवडणूक अधिकारी म्हणून संतोष जाधव यांनी काम पाहिले. त्यांना ग्रामसेवक अंकुश टेंबरे यांनी सहकार्य केले. नूतन उपसरपंच डॉ. वायदंडे यांचा सह्याद्रिचे संचालक माणिकराव पाटील यांच्या उपस्थितीत सरपंच अडसुळे व जाधव यांच्या हस्ते सत्कार करण्यात आला.

नूतन उपसरपंचांचे आ. बाळासाहेब पाटील, माणिकराव पाटील, पी. डी. पाटील बँकेचे संचालक संभाजी पिसाळ, संजय पिसाळ, सरपंच सुवर्णा अडसुळे, संजय पिसाळ, सुनीता पाटील, रामचंद्र पिसाळ, विश्वासराव पिसाळ, अशोक जाधव, विलास पिसाळ, शिवाजी पिसाळ, निवासराव पाटील, दिनकर वायदंडे, बाळासाहेब वायदंडे, विकास वायदंडे, पंकज पिसाळ आदींनी अभिनंदन केले.